Referens
Batang Pasambahan
SAJAK MULO SUMUE BAKALI
AIE BASAUAK
RANTIANG BAPATAH
LUHAK BARAJO
PANGULU BADIRI DALAM NAGARI
JALAN DUO NAN BATURUIK
KATO DUO NAN BAPAKAI
PARTAMO JALAN ADAIK
KADUO JALAN SARAK
JALAN ADAIK ADO BARIHBALABEHNYO
ADO CUPAK GANTANGNYO
ADO SURI TULADANNYO
BAJANJANG BAKEH NAIAK
BATANGGO BAKEH TURUN
JALAN SARAK MANGATAHUI HALA JO HARAM
HARUIH MUKARUAH
SUNAIK JO PARALU
SAH JO BATA
TAUHIK JO MAKRIPAH
KATO BUEK
KATO PUSAKO
BUEK BANA KADIPAKAI
PUSAKO BANA KADIRUNGGUSI
Baitulah dasar adaik nan barlaku di Pandaisikek, sajak badirinya tahun 1805 Masehi. Jadi sajak sabalun parang Padri, dan sabalun parjanjian Bukikmarapalam. Sajak itu alah samo bapakai aturan adaik jo aturan agamo manuruik prinsip jalan duo nan baturuik, kato duo nanbapakai, partamu jalan adaik kaduo jalan sarak. Kaduo-duo aturan adaikjo agamo dipakai manjadi aturan dan filter perilaku. Dalam arti walaupun sasuai jo agamo tapi indak sasuai jo adaik sulik untuak dilakukan. Baitu pulo, bia sasuai bana jo adaik tapi indak sasuai jo agamo indak dapek pulo dilakukan. Jadi nan bisa dikarajokan hanyolah sasuatu nan dibuliahkan oleh kaduo aturan itu.
Adapun adaik Minangkabau, sajak parjanjian Bukikmarapalam, mamakai prinsip Adaik basandi sarak sarak basandi kitabullah. Sabalunnyo adaik basandi alue, alue basandi mupakaik (demokrasi caro kininyo)
Sabananyo kalau diparatian antaro adaik urang Minangkabau jo adaik urang Pandaisikek sangaik babedo. Karano adaik urang Minangkabau alah malalui parubahan (evolusi) wakatu parang Padri. Sadangkan adaik urang Pandaisikek sasuai sajo jo urang Padri sabab sarak lah tamasuak kadalam dasar adaik nan bapakai.
Haji Miskin sakumbalinyo dari Makah memang ado mandapek tantangan dari urang adaik di Pandaisikek dek karano inyo mambaok parubahan sacaro radikal. Katiko itu urang Minang pado umumnyo, tamasuak di Pandaisikek, alah Islam juo walaupun pangatahuan dan pangamalannyo masih saketek. Katiko itu karajo-karajo nan talarang sarupo barambuang, adu ayam, adu kabau, adu jawi dan makan siriah dan lain-lainnyo, masih banyak dikarajokan urang bahkan manjadi bagian dari adaik tu sandiri.
Katiko usaho kaum Padri memparbaiki kaadan masharakik Minangkabu itu alah samakin berkembang manjadi konflik basanjato, urang Pandaisikek dibiakan sajo sabab sacaro formal urang Pandaisikek alah maakui agamo dalam adaiknyo sajak 20 tahun sabalun itu. Alhasil indak pernah ado paparangan antaro urang adaik jo urang agamo di Pandaisikek. Disampiang itu, urang Pandaisikek indak sato jo parjanjian Bukikmarapalam itu.
PANDAISIKEK
Mulai adaik badiri di Pandaisikek, suku nan ado baru ampek suku
KOTO - GUCI - SIKUMBANG - PISANG
Kudian kiro-kiro pado tahun 1855 bakambanglah suku iko manjadi tujuah suku. Yaitu koto dibagi manjadi ampek suku : kotosungaiguruah - kotogantiang - kototibalai - kotolimoparuik, sahinggo sampai kini disabuiklah urang tujuah suku, salapanindu.
Panyalai - Jambak manjadikan salapan indu, karano wakatu itu panyalai jo jambak iko alun lai bapangulu karano alun adolai nan laki-laki nan kadijadian pangulu, sasudah ado pangulunyo mako inyo resmi manjadi suku. Tapi karano wakatu manjadikan tujuah suku panyalai jo jambak alun lai bapangulu mako tatauk sajo urang manyabuik tujuah suku salapan indu sampai kini.
Sumber: Maizar Chan St. Majo Saidi
Songket Info!
Live Chat !
